Fréttir (birtar niðurstöður)

Fylgi Sjálfstæðisflokksins mældist nú 25,4%, tæplega tveimur prósentustigum lægra en í síðustu fylgismælingu MMR sem lögð var fyrir dagana 4. - 14. júní. Fylgi Framsóknarflokksins mældist nú 12,3%, rúmlega þremur prósentustigum hærra en í síðustu könnun en fylgi Pírata mældist nú 12,2%, prósentustigi minna en við síðustu könnun. Þá jókst fylgi Viðreisnar um rúmt prósentustig og mældist nú 9,1% en fylgi annarra flokka mældist nær óbreytt frá síðustu mælingu.

Stuðningur við ríkisstjórnina mældist nú 54,9% og jókst um rúmt prósentustig frá síðustu könnun, þar sem stuðningur mældist 53,7%.

Fylgi Sjálfstæðisflokksins mældist nú 27,0%, rúmlega tveimur prósentustigum hærra en í síðustu fylgismælingu MMR sem lögð var fyrir dagana 25. maí - 1. júní. Fylgi Pírata mældist nú 13,1%, nær óbreytt frá síðustu könnun en fylgi Vinstri grænna jókst um rúmt prósentustig og mældist nú 12,4%. Fylgi Framsóknarflokksins minnkaði um tæplega fjögur prósentustig á milli mælinga og mældist nú 8,8% og fylgi Viðreisnar minnkaði um rúmlega þrjú prósentustig og mældist nú 7,8%. Þá jókst fylgi Flokks fólksins um tæplega þrjú prósentustig og mældist nú 5,5%.

Stuðningur við ríkisstjórnina mældist nú 53,7% og jókst um rúmlega þrjú prósentustig frá síðustu könnun, þar sem stuðningur mældist 50,2%.

Fylgi Sjálfstæðisflokksins mældist nú 24,6%, tæplega tveimur prósentustigum hærra en í síðustu fylgismælingu MMR sem lögð var fyrir dagana 11.-20. maí. Fylgi Pírata mældist nú 13,5%, tveimur og hálfu prósentustigi hærra en í síðustu könnun og fylgi Framsóknarflokksins jókst um tæp þrjú prósentustig og mældist nú 12,5%. Fylgi Vinstri-grænna minnkaði um þrjú prósentustig á milli mælinga og mældist nú 11,1%, fylgi Viðreisnar jókst um rúmt prósentustig og mældist nú 11,0% og fylgi Samfylkingarinnar minnkaði um rúmt prósentustig og mældist nú 10,9%. Þá minnkaði fylgi Miðflokksins um rúmt prósentustig og mældist nú 6,5%.

Yfir helmingur Íslendinga (54%) spáði Daða og Gagnamagninu einu af 10 efstu sætunum í Eurovision í ár en 7% spáðu íslenska framlaginu einu af þremur neðstu sætum keppninnar. Þá voru 88% svarenda sem spáðu íslenska framlaginu, 10 Years, meðal þeirra 25 efstu í keppninni og þar með þátttöku í lokakeppni Eurovision á laugardagskvöld. Þetta kemur fram í nýrri könnun MMR. Bjartsýni landsmanna á velgengni Daða og Gagnamagnsins svipar til afstöðu þjóðarinnar gagnvart Hatara í keppninni 2019, þegar 49% landsmanna spáðu íslenska framlaginu sæti á meðal 10 efstu.

Fylgi Sjálfstæðisflokksins mældist nú 25,6%, sem lætur nærri meðalfylgi flokksins samkvæmt könnunum MMR í apríl síðast liðnum þegar fylgið mældist að jafnaði 25,9% (sveiflaðist frá 23,1% til 28,7%). Sveiflur á fylgi flokksins gefa til kynna að nokkur gerjun eigi sér stað meðal kjósenda nú þegar hyllir undir að faraldrinum taki að ljúka.

Fylgi Sjálfstæðisflokksins mældist nú 28,7%, tæplega sex prósentustigum hærra en við síðustu könnun MMR sem framkvæmd var í byrjun apríl 2021. Aukning fylgis Sjálfstæðisflokksins nú endurspeglar á vissan hátt þróun á fylgi flokksins við upphaf kórónuveirufaraldursins þegar það tók álíka kipp í fylgismælingu MMR í mars 2020, stuttu eftir að fyrsta tilfelli COVID-19 greindist á Íslandi.
Fylgi Vinstri-grænna jókst um tæp þrjú prósentustig frá síðustu könnun og mældist nú 12,9% en fylgi Framsóknarflokksins minnkaði um eitt prósentustig og mældist nú 10,5%.

Fylgi Sjálfstæðisflokksins mældist nú 23,1%, rúmlega tveimur prósentustigum hærra en við síðustu könnun MMR sem framkvæmd var í mars 2021. Fylgi Samfylkingarinnar jókst um tæplega tvö prósentustig og mældist 15,4% og fylgi Pírata jókst um tæplega tvö prósentustig og mældist nú 13,2%. Þá minnkaði fylgi Framsóknarflokksins um rúmt prósentustig og mældist nú 11,5%, fylgi Vinstri-grænna minnkaði um tæplega tvö prósentustig og mældist nú 10,1% og fylgi Miðflokksins minnkaði um rúmlega tvö prósentustig og mældist nú 6,9%.

Um þrír af hverjum fjórum landsmanna (77%) telja hlutina vera að þróast í rétta átt á Íslandi en tæpur fjórðungur (23%) telur þá á rangri braut. Þetta kemur fram í nýrri könnun MMR sem framkvæmd var í febrúar 2021. Þegar litið er á þróun hlutanna í sögulegu samhengi má sjá að hlutfall þeirra sem töldu hlutina vera að þróast í rétta átt jókst um rúm 20 prósentustig eftir að kórónuveirufaraldurinn hófst í mars 2020 og hefur það haldist stöðugt síðan. Af niðurstöðunum má ráða að fólki finnist íslensku samfélagi vegna betur eftir að kórónaveirufaraldurinn skall á með öllum þeim aðgerðum sem fylgdu í kjölfarið.

Nærri fjórðungur heimila er með áskrift að Disney+ og um þrjú af hverjum fjórum hafa áskrift að Netflix. Sjónvarp Símans Premium stendur sterkast meðal innlendra sjónvarps- og streymisþjónusta og er að finna á nærri helmingi allra heimila en Stöð 2 fylgir næst á eftir á rúmum fjórðungi heimila. Þetta kemur fram í nýrri könnun MMR sem framkvæmd var í febrúar 2021.

Þeim fjölgaði milli ára sem helst lýstu áhyggjum af uppgangi öfgaskoðana, glæpum og ofbeldi í íslensku samfélagi. Fjöldi þeirra sem lýstu mestum áhyggjum af atvinnuleysi, sem hafði ríflega tvöfaldast við upphaf kórónuveirufaraldursins, mælist áfram hár en mikið dró úr fjölda þeirra sem lýstu áhyggjum af efnahagssamdrætti. Þá fækkaði þeim töluvert sem sögðust hafa mestar áhyggjur af heilbrigðisþjónustu. Þetta kemur fram í nýrri könnun MMR sem framkvæmd var í febrúar 2021.

Fylgi Sjálfstæðisflokksins mældist nú 21,0%, rúmlega prósentustigi lægra en við síðustu könnun MMR sem framkvæmd var í febrúar 2021. Fylgi Samfylkingarinnar jókst um tæpt prósentustig og mældist 13,8% og fylgi Framsóknarflokksins jókst um rúmt prósentustig og mældist nú 12,7%. Þá lækkaði fylgi Vinstri-grænna um tæplega tvö prósentustig og mældist nú 11,7%, fylgi Miðflokksins jókst um rúmt prósentustig og mældist nú 9,3% og fylgi Flokks Fólksins jókst um eitt og hálft prósentustig og mældist nú 5,1%.

94% landsmanna hafa þegið eða hyggjast þiggja bólusetningu gegn kórónuveirunni COVID-19. Af þeim sem höfðu eða hugðust afþakka bólusetningu voru 5% sem sögðust afþakka bólusetningu með bólefni AstraZeneca ef þeim yrði boðin bólusetning með bóluefninu. Færri sögðust hafa eða ætla að afþakka bóluefni frá Moderna (3%), Janssen (3%) og Pfizer (2%). Þetta kemur fram í nýrri könnun MMR sem framkvæmd var í mars 2021.

Nær helmingur Íslendinga (45%) telja það eins öruggt eða öruggara að ferðast með Boeing 737 MAX flugvélum samanborið við aðrar farþegaþotur en 22% telja það óöruggara. Þriðjungur aðspurðra kvaðst ekki hafa mótað sér afstöðu. Þetta kemur fram í nýrri könnun MMR sem framkvæmd var í janúar 2021. Alls kváðust 10% telja það mun öruggara að ferðast með Boeing MAX þotunum heldur en öðrum farþegaþotum, 12% töldu það nokkuð öruggara, 23% eins öruggt/óöruggt, 11% nokkuð óöruggara og 11% mun óöruggara og 33% kváðust ekki viss.

Áramótaskaupið 2020 var það besta sem sést hefur yfir síðasta áratug að mati landsmanna en 85% þátttakenda í könnun MMR sögðu að þeim hafi þótt Áramótaskaupið gott. Töldu 64% svarenda Skaupið 2020 hafa verið mjög gott, 21% sögðu það frekar gott, 9% bæði og, 3% frekar slakt og 3% mjög slakt.

Fylgi Sjálfstæðisflokksins mældist nú 22,2%, rúmlega tveimur prósentustigum lægra en við síðustu könnun MMR sem framkvæmd var í janúar 2021. Fylgi Vinstri grænna jókst um tæp þrjú prósentustig og mældist 13,5% en fylgi Samfylkingarinnar lækkaði um tvö og hálft prósentustig og mældist nú 13,1%. Þá jókst fylgi Framsóknarflokksins um rúmlega tvö prósentustig og mældist nú 11,4% og fylgi Viðreisnar jókst um tæp tvö prósentustig og mældist nú 10,6%.

Þeir landsmenn sem hyggja á bílakaup á næstunni horfa í auknu mæli til Tesla bifreiða en Toyota er sem áður sú bíltegund sem flestir segja að verði líklegast fyrir valinu. Þetta er á meðal þess sem kemur fram í Bílakaupakönnun MMR 2021 sem er nú fáanleg.

Fylgi Sjálfstæðisflokksins mældist nú 24,4%, tæplega þremur prósentustigum lægra en við síðustu könnun MMR sem framkvæmd var undir lok nóvember 2020. Fylgi Samfylkingarinnar jókst um tæp tvö prósentustig og mældist 15,6% en fylgi Pírata lækkaði um tæp tvö prósentustig og mældist nú 12,3%. Fylgi Vinstri grænna jókst um rúmlega þrjú prósentustig og mældist nú 10,9%, fylgi Framsóknarflokksins jókst um eitt og hálft prósentustig og mældist nú 9,1% og fylgi Miðflokksins jókst um tæp tvö prósentustig og mældist nú 8,6%.

Sprengjuáform landsmanna dragast saman á milli ára en 46% landsmanna sögðu að flugeldum verði skotið upp á heimilum sínum í ár, 9 prósentustigum færri en í könnun síðasta árs.

Enn fækkar þeim sem hyggjast borða hangikjöt á jóladag en vinsældir annars lambakjöts, grænmetisfæðis og nautakjöts halda áfram að aukast. Þetta kemur fram í jólakönnun MMR sem framkvæmd var dagana 10.-16. desember 2020.

Alls kváðust 65% landsmanna ætla að borða hangikjöt sem aðalrétt á jóladag en hlutfall þeirra hefur lækkað um 8 prósentustig frá upphafi mælinga. 8% kváðust ætla að gæða sér á hamborgarahrygg, 5% á lambakjöti öðru en hangikjöti, 5% á grænmetisfæði, 4% á nautakjöti, 3% á kalkún og 11% svarenda kváðust munu borða annað en ofantalið.

Vinsældir hamborgarhryggsins haldast nær óbreyttar milli ára en tæplega helmingur landsmanna (47%) hyggst gæða sér á hátíðarréttinum hefðbundna á aðfangadagskvöld. Lambakjöt annað en hangikjöt (11%) situr í öðru sæti mælinga líkt og í fyrra en færri segjast nú ætla að borða rjúpu (6%) heldur en áður. Þá halda vinsældir grænmetisfæðis áfram að aukast, sér í lagi meðal yngstu svarenda. Þetta kemur fram í nýrri jólakönnun MMR sem framkvæmd var dagana 10.-16. desember 2020.

Þó að vinsældir hamborgarhryggsins hafi dregist saman um 6 prósentustig frá því að mælingar MMR á matarvenjum landans hófust árið 2010 hefur hlutfall þeirra sem sögðust ætla að leggja hann sér til munns á aðfangadagskvöld haldist nokkuð stöðugt yfir síðustu fimm árin. Vinsældir rjúpunnar hafa einnig dregist saman frá því að mælingar hófust og voru nú 4 prósentustigum færri sem sögðust ætla að fá sér rjúpu samanborið við aðfangadag 2010. Hlutfall þeirra sem sögðust ætla að snæða grænmetisrétt heldur þó jafnt og þétt áfram að aukast og telur nú 5% landsmanna, samanborið við einungis 1% við upphaf mælinga.

Allt stefnir í að draga muni úr aðsókn í skötu á morgun en einungis 30% landsmanna segjast ætla að gæða sér á skötu á Þorláksmessu þetta árið. Telja má líklegt að hér sé að merkja áhrif Covid-19 á skötuveislur Íslendinga en hlutfall þeirra sem ætlar í skötu lækkar um sjö prósentustig á milli ára. Áður hafði hlutfallið mælst stöðugt í 35-38% á árunum 2014 til 2019. Alls hefur hlutfall þeirra sem segjast ætla í skötu lækkað um 12 prósentustig frá því að mælingar MMR á jólahefðum landsmanna hófust árið 2011.