Fréttir (birtar niðurstöður)

Nýleg könnun MMR sýnir að fjórir af hverjum fimm Íslendingum hafa notað farsíma undir stýri síðastliðna 12 mánuði, en rannsóknir hafa bent til þess að mikil tengsl séu á milli notkunar farsíma undir stýri og umferðaróhappa.
Sem dæmi má nefna að samkvæmt úttekt The American Safety Council frá árinu 2013 komu símtöl eða skilaboðaskrif í farsíma við sögu í að lágmarki 26% árekstra í Bandaríkjunum.

Samkvæmt könnun MMR hafa 79% Íslendinga notað síma undir stýri síðastliðna 12 mánuði.
Könnunin sýndi þó að fjöldi þeirra sem tala í símann án handfrjáls búnaðar hefur minnkað stöðugt síðan árið 2010 og farið úr 71% árið 2010 í 64% árið 2014 og mældist nú árið 2016 56%.
Aftur á móti hefur fjöldi þeirra sem tala í símann undir stýri með handsfrjálsum búnaði hefur stóraukist úr 24% árið 2014 í 39% árið 2016.
23% svarenda sögðust hafa notað farsíma undir stýri til þess að skrifa eða lesa tölvupóst, sms eða önnur skilaboð á síðastliðnum 12 mánuðum.
Þar að auki sögðust 12% svarenda sögðust hafa notað farsíma undir stýri til þess að taka mynd, 12% til þess að fara á internetið (t.d. til að skoða fréttasíður eða samfélagsmiðla) og 2% til þess að spila tölvuleik.

Spurt var: Hefur þú notað farsíma undir stýri síðastliðna 12 mánuði? Til viðbótar við svarmöguleikana sem sjást á myndinni var svarmöguleikinn Veit ekki/vil ekki svara. Samtals tóku 98,7% afstöðu til spurningarinnar.

Svör eftir lýðfræðihópum:

Eldri aldurshópar voru mun ólíklegri til að nota síma undir stýri. Þannig sögðust 57% þeirra sem voru 68 ára eða eldri ekki hafa notað farsíma undir stýri síðastliðna 12 mánuði, samanborið við 25% þeirra sem voru 50-67 ára og 12% þeirra sem voru 30-49 ára. Tekjulægri hópar voru einnig ólíklegri til að nota farsíma undir stýri. 

Athygli vekur að fólk sem búsett var á höfuðborgarsvæðinu var mun líklegra til að tala í farsíma undir stýri með handfrjálsum búnaði, eða 46%, samanborið við 28% þeirra sem höfðu búsetu á landsbyggðinni. 29% þeirra sem voru 18-29 ára höfðu notað farsíma undir stýri til að taka mynd. Til samanburðar höfðu 12% þeirra sem voru á aldrinum 30-49 ára notað síma undir stýri til að taka mynd en innan við 1% þeirra sem voru 50 ára eða eldri.  

Fyrri kannanir sama efnis:

MMR könnun 2014: Notkun farsíma undir stýri
MMR könnun 2010: Notkun farsíma undir stýri

Upplýsingar um framkvæmd:

Úrtak: Einstaklingar 18 ára og eldri, valdir handahófskennt úr hópi álitsgjafa MMR
Könnunaraðferð: Spurningavagn MMR
Svarfjöldi: 904 einstaklingar, 18 ára og eldri
Dagsetning framkvæmdar: 7. til 14. nóvember 2016