Rúmlega þriðjungur landsmanna starfar við breytt vinnufyrirkomulag sökum útbreiðslu kórónaveirunnar og 15% sögðust eingöngu vinna að heiman þessa dagana. Þetta kemur fram í nýrri kórónavíruskönnun MMR. Af þeim sem kváðust í vinnu og tóku afstöðu til spurningarinnar sögðu 62% vinnufyrirkomulag sitt óbreytt þrátt fyrir útbreiðslu kórónaveirunnar, 23% kváðust vinna að hluta til að heiman þessa dagana og 15% kváðust eingöngu vinna að heiman sökum útbreiðslu veirunnar.
Spurt var: „Vinnur þú að heiman þessa dagana sökum útbreiðslu kórónaveirunnar?“.
Svarmöguleikar voru: „Nei, vinnufyrirkomulag mitt er óbreytt (ég vinn jafn mikið/lítið að heiman og ég gerði áður)“,
„Já, ég vinn að hluta til að heiman sökum kórónaveirunnar“, „Já, ég vinn eingöngu að heiman sökum kórónaveirunnar, „Á ekki við / er ekki í vinnu“ og „Vil ekki svara“.
Svarhlutfall var 76,0% en 21,4% svöruðu að spurningin ætti ekki við eða að þau væru ekki í vinnu og 2,5% vildu ekki taka afstöðu.
Munur eftir lýðfræðihópum
Karlar (64%) reyndust líklegri en konur (59%) til að segjast starfa við óbreytt vinnufyrirkomulag en konur reyndust líklegri til að vinna að heiman að hluta til (25%) eða að öllu leyti (16%) heldur en karlar (22% að hluta til, 13% að öllu leyti).
Svarendur 50-67 ára (73%) reyndust líklegri en svarendur annarra aldurshópa til að segjast starfa við óbreytt vinnufyrirkomulag en svarendur á aldrinum 30-49 ára ólíklegastir (59%). Svarendur 30-49 ára (33%) reyndust hins vegar líklegri en svarendur annarra aldurshópa til að segjast vinna að hluta til að heiman vegna veirunnar. Þá reyndust svarendur 18-29 ára (23%) og 68 ára og eldri (19%) líklegri til að segjast vinna eingöngu að heiman sökum útbreiðslu kórónuveirunnar heldur en þau 30-49 ára (13%) og 50-67 ára (10%).
Svarendur af landsbyggðinni (76%) reyndust líklegri en þeir af höfuðborgarsvæðinu (55%) til að segja vinnufyrirkomulag sitt óbreytt en svarendur af höfuðborgarsvæðinu reyndust bæði líklegri til að segjast vinna að heiman að hluta til (28%) eða að öllu leyti (18%) heldur en þeir af landsbyggðinni (16% að hluta, 8% að öllu leyti).
Nokkurn mun var að sjá á vinnufyrirkomulagi svarenda eftir starfsgreinum en vélafólk og ófaglærðir (99%) og bændur og sjómenn (94%) reyndust líklegastir allra til að segjast starfa við óbreytt vinnufyrirkomulag en sérfræðingar ólíklegastir (36%). Sérfræðingar (45%) reyndust hins vegar líklegastir til að segjast vinna að hluta til að heiman sökum kórónaveirunnar en næst á eftir komu tæknar og skrifstofufólk (27%) og stjórnendur og æðstu embættismenn (24%). Sérfræðingar (19%) reyndust einnig líklegri en svarendur úr öðrum starfsgreinum til að segjast eingögnu vinna að heiman þessa dagana.
Ef litið er til stjórnmálaskoðana svarenda má sjá að svörun reyndist nokkuð breytileg á milli stuðningsfólks stjórnmálaflokkana. Stuðningsfólk Framsóknar (78%), Miðflokks (69%) og Sjálfstæðisflokksins (65%) reyndist líklegra en aðrir til að segja vinnufyrirkomulag sitt vera með óbreyttum hætti en stuðningsfólk Vinstri-grænna (41%) ólíklegast. Stuðningsfólk Vinstri-grænna reyndist hins vegar líklegra en aðrir til að segjast vinna að hluta til að heiman þessa dagana en stuðningsfólk Miðflokks (16%) og Framsóknar (17%) ólíklegast. Þá reyndist stuðningsfólk Framsóknar (4%) ólíklegra en stuðningsfólk annarra flokka til að segjast eingöngu vinna að heiman þessa dagana sökum útbreiðslu kórónaveirunnar.
Einnig var spurt um ýmis áhyggjuefni svarenda í tengslum við útbreiðslu kórónaveirunnar, svo sem áhyggjum af áhrifum á íslenskan efnahag, af því að smitast sjálf(ur) og af mögulegu tjóni á fjárhag eða heilsufari í kjölfar veikinda af völdum kórónaveirunnar. Lítill munur reyndist að mestu á vinnufyrirkomulagi svarenda eftir áhyggjum þeirra en í ljós þó kom að þeir svarendur sem kváðust hafa miklar áhyggjur af mögulegu heilsutjóni sínu af völdum útbreiðslu kórónaveirunnar reyndust líklegastir allra til að segjast vinna eingöngu að heiman (29%) og ólíklegastir til að segjast vinna að hluta til að heiman (11%). Þeir svarendur sem kváðust hafa frekar miklar áhyggjur af heilsutjóni reyndust hins vegar líklegastir allra til að segjast vinna að hluta til að heiman (31%) en lítill munur reyndist á hlutfalli þeirra sem kvaðst starfa við óbreytt vinnufyrirkomulag eftir áhyggjum á heilsutjóni.
Upplýsingar um framkvæmd:
Úrtak: Einstaklingar 18 ára og eldri valdir handahófskennt úr hópi álitsgjafa MMR
Könnunaraðferð: Spurningavagn MMR
Svarfjöldi: 1.081 einstaklingar
Dagsetning framkvæmdar: 18. til 20. mars 2020