Vinstri græn mælast nú með mest fylgi íslenskra stjórnmálaflokka samkvæmt könnun MMR, eða 21,8%. Þar á eftir mælist fylgi Sjálfstæðisflokksins 21,1%. Gagnaöflun stóð yfir dagana 6. til 11. október 2017.
Bæði Vinstri græn og Sjálfstæðisflokkurinn hafa tapað fylgi frá síðustu mælingu MMR sem lauk 28. september 2017 en þá mældust Vinstri græn með 24,8% fylgi og Sjálfstæðisflokkurinn með 23,5% fylgi. Fylgi Samfylkingarinnar mælist nú 13,0% en það er aukning upp á 3 prósentustig frá síðustu mælingu. Miðflokkurinn mælist með stuðning 10,7% kjósenda og mælist þar með stærri en Píratar, Flokkur fólksins og Framsóknarflokkurinn.
Stuðningur við ríkisstjórnina lækkaði milli mælinga. Kváðust 21,8% styðja ríkisstjórnina samanborið við 22,5% í síðustu könnun.
Fylgi Samfylkingarinnar mældist nú 13,0% og mældist 10,4% í síðustu könnun.
Fylgi Miðflokksins mældist nú 10,7% og mældist 7,3% í síðustu könnun.
Fylgi Pírata mældist nú 10,5% og mældist 10,0% í síðustu könnun.
Fylgi Flokks fólksins mældist nú 7,4% og mældist 8,5% í síðustu könnun.
Fylgi Framsóknar mældist nú 5,9% og mældist 6,4% í síðustu könnun.
Fylgi Bjartrar framtíðar mældist nú 4,2% og mældist 2,5% í síðustu könnun.
Fylgi Viðreisnar mældist nú 3,6% og mældist 4,9% í síðustu könnun.
Fylgi annarra flokka mældist 1,8% samanlagt.
Lagðar voru allt að þrjár spurningar fyrir svarendur um stuðning þeirra við stjórnmálaflokka. Allir voru spurðir spurningar 1: „Ef kosið yrði til Alþingis í dag, hvaða flokk myndir þú kjósa?“. Þeir sem svöruðu „Veit ekki/óákveðin(n)“ við spurningu 1 voru því næst spurðir spurningar 2: „En hvaða flokkur yrði líklegast fyrir valinu?“. Ef aftur var svarað „Veit ekki/óákveðin(n)“ þá voru þátttakendur að lokum spurðir spurningar 3: „Hvort er líklegra að þú kysir Sjálfstæðisflokkinn eða einhvern hinna flokkanna?“. Fjölda þeirra sem svaraði "einhvern hinna" í spurningu 3 var skipt milli annarra flokka en Sjálfstæðisflokksins í sama hlutfalli og fylgi þeirra var skv. spurningum 1 og 2. Samtals voru 85,9% sem gáfu upp afstöðu til flokka, aðrir kváðust óákveðnir (3,1%), myndu skila auðu (5,5%), myndu ekki kjósa (1,8%) eða vildu ekki gefa upp afstöðu sína (3,7%). Myndin sýnir niðurstöðu könnunar að viðbættum efri og neðri vikmörkum miðað við 95% öryggisbil ásamt samanburði við síðustu kannanir þar á undan.
Þróun yfir tíma
Stuðningur við ríkisstjórnina
Upplýsingar um framkvæmd:
Úrtak: Einstaklingar 18 ára og eldri, valdir handahófskennt úr hópi álitsgjafa MMR.
Álitsgjafar MMR eru valdir úr Þjóðskrá þannig að þeir endurspegli lýðfræðilega samsetningu þjóðarinnar á hverjum tíma.
Könnunaraðferð: Spurningavagn MMR
Svarfjöldi: 966 einstaklingar, 18 ára og eldri
Dagsetning framkvæmdar: 6. til 11. október 2017