Fréttir (birtar niðurstöður)

Svo virðist sem lítil breyting sé á afstöðu landans til þess hvort mismunandi trúfélög fái að byggja trúarbyggingar á Íslandi. Þetta er meðal þess sem sjá má út úr nýjustu könnun MMR um málefnið. 
Líkt og í fyrri könnunum kváðust flestir svarendur hlynntir því að Þjóðkirkjan fái að reisa trúarbyggingar á Íslandi. Meirihluti svarenda var hlynntur því að Ásatrúarfélagið fái að reisa trúarbyggingar á Íslandi en færri voru hlynntir því að Búddistafélagið, Rússneska rétttrúnaðarkirkjan eða Félag múslima fái að reisa trúarbyggingar. Sé litið til eldri mælinga má sjá að þeim sem hlynntir eru að Þjóðkirkjan fái að reisa trúarbyggingar á Íslandi hefur farið fækkandi síðan mælingar hófust árið 2013.

Af þeim sem tóku afstöðu sögðust flestir, eða 62,2%, vera fylgjandi því að Þjóðkirkjan fengi að byggja trúarbyggingar á Íslandi, en árið 2013 sögðust 67,2% fylgjandi því að Þjóðkirkjan fengi að byggja trúarbyggingar í landinu. Önnur trúfélög nutu minni stuðnings. Þannig sögðust 54,4% vera fylgjandi því að Ásatrúarfélagið fengi að byggja trúarbyggingar á Íslandi, 41,4% voru fylgjandi því að Búddistafélagið fengi að byggja trúarbygginar, 35,5% voru fylgjandi því að Rússneska Rétttrúnaðarkirkjan fengi að byggja trúarbyggingar og 32,4% voru fylgjandi því að Félag múslima á Íslandi fengi að byggja trúarbyggingar á Íslandi.

Fæstir voru andvígir því að Þjóðkirkjan fengi að byggja trúarbyggingar á Íslandi (11,2%) en flestir sögðust vera andvígir því að Félag múslima fengi að byggja trúarbyggingar á Íslandi (42,1%). Hvað önnur trúfélög varðar voru 12,1% andvíg þvi að Ásatrúarfélagið fengi að byggja trúarbyggingar á Íslandi, 20,6% Búddistafélagið og 28,5% Rússneska réttrúnaðarkirkjan.

Spurt var: „Hversu fylgjandi eða andvíg(ur) ertu því að eftirfarandi trúfélög fái að byggja trúarbyggingar á Íslandi?
-með trúarbyggingum er átt við byggingar svo sem moskur, hof, kirkjur og musteri.“
Svarmöguleikar voru: Mjög andvíg(ur), Frekar andvíg(ur), Hvorki né, Frekar fylgjandi, Mjög fylgjandi og Veit ekki/vil ekki svara
Samtals tóku 95,4% afstöðu til spurningarinnar (þ.e. tóku afstöðu til amk. eins trúfélags)

Afstaða til þess að mismunandi trúfélög fái að byggja trúarbyggingar á Íslandi ólík eftir aldri og stjórnmálaskoðunum.
Hlutfall þeirra sem voru fylgjandi því að Þjóðkirkjan fengi að byggja trúarbyggingar var hærra á meðal þeirra sem eldri voru en á meðal þeirra yngri. Af þeim sem tóku afstöðu og tilheyrðu elsta aldurshópnum (68 ára og eldri) sögðust 88,1% vera fylgjandi því að Þjóðkirkjan fengi að byggja trúarbyggingar á Íslandi, borið saman við 47,1% þeirra sem tilheyrðu yngsta aldurshópnum (18-29 ára).
Aftur á móti var hlutfall þeirra sem voru fylgjandi því að Félag múslima á Íslandi fengi að byggja trúarbyggingar á Íslandi hærra á meðal þeirra sem yngri eru en á meðal þeirra sem eldri eru. Af þeim sem tóku afstöðu og voru á aldrinum 30-39 ára sögðust 43,2% vera fylgjandi því að Félag múslima á Íslandi fengi að byggja trúarbyggingar á Íslandi, borið saman við 17,3% í elsta aldurshópnum (68 ára og eldri). 

Þegar afstaða til þess að mismunandi trúfélög fái að byggja trúarbyggingar á Íslandi var skoðuð eftir stuðningi við stjórnmálaflokka kom í ljós að þeir sem studdu Framsóknar- og Sjálfstæðisflokkinn gerðu frekar greinarmun á Þjóðkirkjunni og öðrum trúfélögum en þeir sem studdu aðra flokka. Af þeim sem tóku afstöðu og studdu Framsóknarflokkinn sögðust 64,9% vera fylgjandi því að Þjóðkirkjan fengi að byggja trúarbyggingar á Íslandi en 9,0% voru fylgjandi því að Félag múslima á Íslandi fengi að byggja trúarbygginar á Íslandi. Meðal Sjálfstæðismanna sögðust 68,9% vera fylgjandi því að Þjóðkirkjan fengi að reisa trúarbyggingar á Íslandi og 24,7% voru fylgjandi því Félag múslima á Íslandi fengi að byggja trúarbyggingar.
Til samanburðar sögðust 45,1% þeirra sem studdu Pírata vera fylgjandi því að Þjóðkirkjan fengi að byggja trúarbyggingar á Íslandi og 36,2% voru fylgjandi því að Félag múslima á Íslandi fengi að byggja trúarbyggingar. 

Í sömu könnun (á eftir þessari spurningu) var jafnframt spurt um afstöðu fólks til þess að trúfélög fái almennt úthlutað ókeypis lóðum undir trúarbyggingar. Sjá niðurstöður hér.

Upplýsingar um framkvæmd:

Úrtak: Einstaklingar 18 ára og eldri, valdir handahófskennt úr hópi álitsgjafa MMR
Könnunaraðferð: Spurningavagn MMR
Svarfjöldi: 985 einstaklingar, 18 ára og eldri
Dagsetning framkvæmdar: 20. til 26. september 2016

Eldri kannanir sama efnis:
2015 september: MMR könnun: viðhorf til þess að mismunandi trúfélög fái að byggja trúarbyggingar á Íslandi.
2014 september: MMR könnun: viðhorf til þess að mismunandi trúfélög fái að byggja trúarbyggingar á Íslandi.
2013 september: MMR könnun: viðhorf til þess að mismunandi trúfélög fái að byggja trúarbyggingar á Íslandi.